Opisyal nang pinirmahan ang Memorandum of Partnership Agreement (MOPA) para sa pagsasagawa ng Rapid Land Tenure Appraisal (RLTA) at Titling Program sa Munisipyo ng Ibaan, Batangas sa pagitan ng DENR CALABARZON at ng lokal na pamahalaan ng Ibaan noong ika-20 ng Abril 2022.

Ang programa ng RLTA ay naglalayon na maimbentaryo ang lahat ng parsela ng lupa na sakop ng aprubadong survey ng kadastro (Ibaan Cadastre) at malaman ang tunay na estado ng pagmamay-ari ng mga lupain sa lahat ng barangay ng Ibaan. Sa pamamagitan ng RLTA at pinalakas na programa ng DENR-LGU Partnership on Public Land Titling, mabibigyan kalinawan at solusyon ang mga usapin at isyung may kinalaman sa pagmamay-ari at pagpapatitulo ng lupa, sa pamamagitan ng pagpapatibay ng ugnayan at pagtutulungan ng Kagawaran ng Kapaligiran at Likas na Yaman o DENR at ng lokal na pamahalaan. Ang programa ay magbibigay gabay at direksyon sa bawat Ibaeño sa pagpapatitulo ng kanilang mga lupa ng hindi na umaalis sa Bayan ng Ibaan sapagkat maari nang tanggapin sa munisipyo ang mga aplikasyon at simulan itong iproseso.

Dinaluhan ang MOPA Signing ng mga opisyal mula sa CENRO Lipa, PENRO Batangas, DENR IV-A CALABARZON kasama si Mayor Edralyn Joy Salvame ng Ibaan, Batangas.

Pinagbibigay alam na lahat ng alituntunin hinggil sa pagiingat at pagpapanatili ng kaligtasan laban sa banta ng COVID19 ay maayos na nasunod sa pagsasagawa ng nasabing gawain. ###

Details
Parent Category: News & Events
Category: Photo Releases
Published: 04 May 2022